“الخبر الحصرى”الكيك بوكسينج مضاد للاكتئاب و يحسن المزاج
كتبت / مهرائيل وائل
“ينشر الخبر الحصرى”
انفرد موقع الخبر الحصرى بحوار خاص مع الكابتن حسام شافعي مدرب كيك بوكسينج و بوكسينج، ليكشف لنا عن مدي أهمية الرياضة في حياتنا اليومية بصفة عامة، ورياضة الكيك بوكسينج بصفة خاصة وتحديداً للفتيات.
قال حسام الشافعي أن: ” الكيك بوكسينج لعبة دفاع عن النفس ، وفي وقتنا الحالي تحتاج الإناث أن تدافع عن نفسها، كما تحافظ تلك الرياضة علي اللياقه البدنيه و الصحه العامه و يجعل شكل الجسم متناسقاً وهذا ما يعطي للفتيات ثقه عاليه بأنفسهن”.
و أضاف حسام، “تحتاج الاهالي في الحياه اليوميه الاطمئنان علي بناتهم و بالتالي مزاولتها لرياضة الكيك بوكسينج بتزود الثقه عندها.
وواصل: “الكيك بوكسينج لعبة قوه و فيها نسبة عنف بسبب وجود مواجهات مباشره بين لاعبين و ده شيء كويس لانه يعطي البنت ثقه في النفس و يعلمها ازاي تواجه”.
وتابع: حسام “ان الكيك بوكسينج مش بيقوم ببناء عضلات للبنات و ليست لعبة تكسير او تشويه للوجه لانها زي ما بتتعلم انها تضرب بتتعلم انها تدافع كويس جدا و ايضا الكيك بوكسينج بيعالج بعض المشاكل النفسيه لان انتي بتكوني معظم الوقت مضغوطه و تحت ضغط نفسي لما هتدربي كيك بوكسينج( لعبة عنف ) هتخرجي الطاقه السلبيه دي و هتكوني اهدي نفسيا و يكون عندك ثبات انفعالي وتقدرى تتحكمي كويس في نفسك”.
و أردف حسام: “إحدي المتدربات، من فتره ولد شد منها الشنطه بتاعتها قامت هي شدتها منه و وقعته و ناس طلبوا الشرطه و هي قبل ما تدرب كانت بتخاف و معندهاش الجرأه انها تعمل هذا فعل لكن الكيك بوكسينج ساعدها و علمها ازاي تدافع عن نفسها”.
ورصد موقع الخبر الحصري تجارب المتدربات مع الكيك بوكسينج و البوكسينج، لتسردن لنا الآتي:
قالت المتدربه چودي، “كنت بخاف امشي في شارع يكون فيه مجموعة شباب علشان ممكن يضايقوني بعد ما اتدربت كيك بوكسينج بقت بمشي في اي مكان عادي جدا
بقي عندي ثقه في نفسي اني اقدر اواجه اي حاجه ممكن تحصلي”.
كما أضافت المتدربه اسماء، “كانت مشكلتي صعبه شويه كان وزني ١٢٥ ك و النزول في الوزن كان صعب بالنسبالي كان عندي اكتئاب و مكنتش قادره ابطل اكل و عياط و مكنتش بقدر اخد نفسي و كنت معتقده اني علشان انزل في الوزن لازم اعمل عملية انقاص في وزن”.
و أضافت اسماء، “ذهبت لكي اتدرب بوكسينج لمدة اربع شهور خففني من الاكتئاب كنت بطلع طاقتي في التمرين و اتعلمت ازاي ادافع عن نفسي خصوصا اني كنت جبانه و اتعلمت ازاي اتحكم في نفسي و في اكلى”.
و أكدت اسماء، “حدث لي اختلاف كبير غيرلي حياتي في كل حاجه في لبسي بقت بلبس زي البنات اللي في سني و في حركتي و شكلي”.
واختتمت اسماء، “كانوا صحابي بيقولولي انتي بتلعبي بوكسينج يعني هتضربينا و دي لعبة ولاد لكن لا ده كلام مش صح انا كنت بنزل في وزن بشكل سليم و صحي و كنت بخرج الطاقه اللي عندي بطريق سليمه و مفيده البوكسينج ساعدني اوصل لهدفي”.
