“الخبر الحصرى”أهم مشاهير اليوتيوب
كتبت/مروة عيد
“ينشر الخبر الحصرى”
عمرك تخيلت نفسك إنك تصحى يوم من النوم، وتلاقي نفسك مليونير… في ناس قدمت محتوى لقوا بيه قبول عالي عند الناس ومن ساعتها وهما شغلهم الشاغل إزاى يطوروا من إلي بيقدموه علشان يجيبوا فلوس كتير.
أهم مشاهير اليوتيوبرز العرب إلي حققوا أرباح عالية.
المركز الأول، وهى الطفلة ( شَفَا ) من الإمارات، عمرها ١٠ سنين وإلي حققت نسبة أرباح عالية من المحتوى إلي بتقدم..الطفلة شفا بتقدم فيديوهات عن حياتها اليومية، ومقالب مع أختها ومامتها وأفكار ترفيهية، وموضوعات بتجذب بيها أطفال جيلها، عملت أكتر من قناة على اليوتيوب، نسب المشاهدة في القنوات عالية تتقدر بحوالي ٣٣ مليون مشترك ، و ١٤ مليار مشاهدة.
المركز التاني هو ( عائلة مُشَيَّع ) وصاحبها هو محمد مُشيَّع وهو من أشهر اليوتيوبر في السعودية، عمره ٣٨ سنة، هو أكبر إخواته، والده من السعودية، ووالدته بريطانية،، عيلته هى إلي بتقدم معاه محتوى القناة ، وكمان ولاده ” أنس ويوسف وچاد، وإيمان” الحلو إلي جذب الناس ليهم إن محتواهم إلي بيقدموه ترفيهي ومُسَلِّي، وبيعملوا مقالب في بعض وكمان بيقدموا مشاهد تمثيلية صغيرة للأطفال…محمد مُشيَّع ساب شُغله الأصلي إلي هو مهندس برمجيات، وإتفرغ لقناته ع اليوتيوب لأن الأرباح إلي بتطلع منها كويسة جداً…القناة عليها حوالي ٢١ مليون مشترك، و١٢ مليار مشاهدة .
المركز الثالث ( نور ستارز) من العراق
بتقدم تحديات ونصايح للبنات بطريقة حلوة جذبت ليها مشتركين كتير على قناتها وعدد المشتركين في القناة حوالي ١٩ مليون مشترك، وأكتر من ١٠ مليار مشاهدة في السنة.
المركز الرابع من اليوتيوبرز إلي حققوا نسب أرباح عالية من كُتر المشاهدات على قناتهم وهو ( أبو فَلَّة ) من الكويت،، أبو فلة ده اسم قناته ع اليوتيوب، لكن اسمه الحقيقي ” حسن سليمان” وعنده ٢٤سنة، وهو يعتبر من أنجح وأشهر اليوتيوبرز الجُداد..وسمَّي القناة بالإسم الفكاهي ده علشان يضحَّك الناس، ويقولهم إنها فلَّة منه.
أبو فلَّة بيلعب الألعاب المميزة على قناته زي فورت نايت، وبب چي، ده غير ألعاب تانية بيقدمها…مشتركين القناة حوالي ١٨ مليون مشترك، ونِسَب المشاهدة سنويًا ٩مليار مُشاهِد.
المركز الخامس هو ( سيد ) من البحرين صاحب قناة شبكة ألعاب العرب، القناة دي من أكتر القنوات إلي عليها تفاعل في الشرق الأوسط، وشمال إفريقيا، وبتتصدر فيديوهات الألعاب لكل الدول العربية… القناة عليها ١٤ مليون مشترك ، و٧ مليار مشاهدة في السنة.
المركز السادس ( أنس وأصالة )من سوريا، وهما بيقدموا محتوى عائلي مع بنتهم الصغيرة ميلا ، عدد المشتركين في القناة ١٢ مليون مشترك، وحوالي ٦ مليار مشاهدة.
المركز السابع ( ناز ) هو من أكتر مشاهير اليوتيوبر في السعودية، عمره ٢٨ سنة، أخوه يوتيوبر مشهور إسمه تايجر، كان بادئ قبله وكان ناز بيظهر معاه في بعض الفيديوهات، لما حس ناز بقبول من الناس حب يجرب الفكرة وفعلاً نجح وإتفوق على غيره من اليوتيوبرز التانيين،، بدأ ناز في اليوتيوب بكل أنواع المحتوى لكنه فِهِم إنه لازم يركز على محتوى واحد مناسب يتميز بيه، وفعلاً قدم مقالب وتحديات نالت إعجاب جمهوره، وإتشتهر ب ” ناز ريأكشن ” إلي معناها بالإنجليزي رد الفعل ..وهو اسم على مسمى متابعيه كانوا بيستنوا يشوفوا المقلب الجديد علشان يشوفوا رد فعل الناس إلي معمول فيها المقلب … جمع على قناته ١١ مليون مشترك وحوالي ٥ مليار من المشاهدات في السنة.
المركز الثامن ( نارين بيوتي ) من سوريا
عملت نوع جديد من الأغاني خاصة بيها، وهى أغاني راب حققت نجاح كبير في الوطن العرب ولفتت انتباه الجميع بطريقة الغنا الجديدة إلي ميزتها وليها قناة عاليوتيوب،
على قناتها أكتر من ١١ مليون مشترك، والمشاهدات كمان أكتر من ٥ مليار مشاهدة.
المركز التاسع هو ( بندر إسكندر ) سعودي الجنسية، عنده ٢٣ سنة، عنده قناة إسمها بندريتا بيقدم فيها محتوى ألعاب شيق ومثير للشباب والأطفال كمان …بندر موجود على قناته أكتر من ١٠ مليون من الإشتراكات ، و٥ مليار مشاهدة.
المركز العاشر ( روَان وريَّان ) وهما يوتيوبرز توأم لكن مش شبه بعض، هما من دولة الأردن ، بيقدموا تحديات ومسابقات بينهم، موجود على قناتهم أكتر من ٩ مليون مشترك، وعدد المشاهدات عندهم من جميع الدول ،وهما تقريباً حوالي ٤مليار مشاهدة.
وغيرهم يوتيوبرز كتير ، وممكن إنت كمان تكون واحد منهم في يوم من الأيام،، لو إستغليت دماغك صح.
